دنے، دوپہریں ۔۔۔ احمد نعیم ارشد

دنے، دوپہریں

احمد نعیم ارشد

خوشحالی دے سُفنے ویکھن والیو اکھیو!
آپے ای اپنے ہنجواں دے وِچ
ڈُب کے مر جاؤ
لمے لمے نعرے لاون والیو
جِیبھوں
اپنے اپنے دنداں تھلے آ جاؤ تے چِتھیاں جاؤ

اوکھا ویلا ویکھ کے سر تے
لوک راج دا نعرا لاون والے لیڈر
مطلب دے لئی ہر آمر دے
نغمے گاون والے لیڈر
ساڈے جذباتاں نال کھیڈ کے
کِنے خُش خُش
وطنوں باہر جا بہندے نیں
ساڈے پَلے پا جاندے نیں حُب الوطنی
ساڈیاں ہڈیاں اُ تے ما س وی رہن نہیں دیندے
اپنے جسماں اُتے کھرچ وی آن نہیں دیندے
چنگی گل اے
ساڈا وی تے ایہو حل اے
ساہنوں وی تے دِنے دپہریں سُفنے ویکھن دا اے چاہ
تاہیوں ہر واری ہی ساڈے گل وِچ پے جاندا اے پھاہ
ساہنوں فیر وی مَت نہیں آندی
تھاں تھاں مَتھا ٹیکن والی
ساڈے اندوں لت نہیں جاندی۔۔۔۔۔۔۔۔!

دِنے دُ پہریں
خوشحالی دے سُفنے ویکھن والیو اکھیو!
آپے ای اپنے ہنجواں دے وِچ
ڈُب کے مر جاؤ
لمے لمے نعرے لاون والیو
جِیبھوں
اپنے اپنے دنداں تھلے آ جاؤ تے چِتھیاں جاؤ

Share your Thoughts:

This site uses Akismet to reduce spam. Learn how your comment data is processed.

Show Buttons
Hide Buttons
%d bloggers like this: