اے میرے غم ۔۔۔ اختر حسین جعفری

“اے میرے غم”

اختر حسین جعفری

جَلتے مہر، خُنک مہتاب کے رنگ سمجھتے، تارِ نظر کی گِرہیں کھولتے
ریشم بُنتے عُمر کَٹی ہے
اے میرے غم! تیرے بدن کی عُریانی کا، تیری محرُومی کا دُکھ ہے
صُبح دعا میں تیرا قاصد، تیرا موذّن سب سے سچّا
سب سے زیبا
شامِ وغا میں خالی لَوٹتے ہر رہوار پہ تیری چادر
ہر چادر پر جتنا ہے خونناب، تِرا ہے
حَلقہ حَلقہ کُھلتے طوق پہ تیرے عِجز کا اسمِ اعظم
اے میرے غم!

اے میرے غم! شہرِ ناقدراں کے بے اَفلاک سِتارے!
آخرِ شب کی تاگا تاگا ٹوُٹتی ضَو میں
تیری محرُومی کا دُکھ ہے!!!