دھیان ۔۔۔ حسین عابد
دھیان
حسین عابد۔۔
او
لفظوں کی گرد اُڑاتی سوچو
جھاگ اُگھلتے جذبو
اک دوجے کے دائرے کاٹتے گُنگ خیالو
بیداری کے راہبرو
نیند کے پہریدارو
ڈرو مِری یلغار سے
میں وہ نور کا دھبہ
وہ تاریک گڑھا
جو آپ ازل ہے، آپ ابد
میرے اس اک ادنٰی آج کے
تخت پہ قبضہ کرنے کی سازش میں جُٹے غلامو
او باتونی سوچو، بپھرے جذبو، گُنگ خیالو
بیداری کے راہبرو
نیند کے پہریدارو
ڈرو مِری یلغار سے…..
Facebook Comments Box