شفا خانوں کے باہر ۔۔۔ رخسانہ صبا

شفا خانوں کے باہر

رخسانہ صبا

پلاسٹک کے لبادوں میں سر سے پاوں تک لپٹے لوگ

مجھے شفا خانوں کی آسیب زدہ راہداریوں میں

بھٹکتی ہوئی معصوم روحون کی طرح ادھر سے ادھر بھاگتے ہوئے نظر آتے ہیں

مگر یقین کے دستانے پہن کر

اور خوش رنگ امیدوں کے ماسک لگا کر

یہ آسیب زدہ روحیں

زندگی سے ہاتھ ملانے کی کوشش کرتی ہیں

شاید وہ سچائی بھول گئی ہیں

کہ زندگی تو خود ایک بد روح ہے

جو وجود کی حویلی کو آباد نہیں ہونے دیتی

اور نہ جانے کتنے مکینوں کو

وینٹی لیٹر پر ڈال کر رکھتی ہے

اور یہ اعلان کرتی رہتی ہے

وینٹی لیٹر کی ضرورت

شفاخانوں کے اندر ہی نہیں

شفا خانوں کے باہر بھی۔