غزل ۔۔۔ اختر کاظمی

غزل

( اختر کاظمی )


سچ نوں کٹھنائیاں دے دھکے جردیاں تکیا
جھوٹ نوں صرف کتاباں دے وچ ھردیاں تکیا
عمراں لنگھ چلیاں دکھاں دیاں دھپاں سہندے
اسیں تے کدی ناں مینہ خوشیاں دا وردیاں تکیا
بھلے دناں دے دل نوں خوش کردے خواباں نوں
اکھ کھلی تے تڑف تڑف کے مردیاں تکیا
ویلے دے منہ زور سمندر وچ اج تائیں
کدی ناں آساں دی بیڑی نوں تردیاں تکیا
اپنے آپ نوں لبھن دا چاہ جس نوں چڑھیا
اوھنوں اکلاپے دا دکھ ای جردیاں تکیا
ڈاھڈیا ربا توں جگ وچ کسراں بندیاں نوں
غرضاں لئی بندیاں نوں سجدے کردیاں تکیا
اپنی اصل توں ڈرے ھوئے لوکاں نے اختر
جد وی شیشہ تکیا ڈردیاں ڈردیاں تکیا

Share your Thoughts:

This site uses Akismet to reduce spam. Learn how your comment data is processed.

Show Buttons
Hide Buttons
%d bloggers like this: