Naseem Syed was born on 19 Feb 1947 at Allahabad UP. She is currently residing in Toronto, Canada working for a hotel as manager. ‘Aadhii Gavahii’ and ‘Samandar Raastaa degaa’ are his poetic collection

بدن کی اپنی شریعتیں ہیں

( نسیم سید )

قبول و ایجاب کی شریعت

درست۔۔۔لیکن!

بدن کی اپنی شریعتیں ہیں

حقیقتیں ہیں

سوال ہیں

اپنے فیصلے ہیں

تو فرض جیسی عبادتوں سی

محبتوں

اور حفظ۔۔۔جیسی

تلاوتوں سی۔۔۔لگاوٹوں سے

نہ کھلنے والی گرہ کے

انکار کو سمجھنے

جو گھپ اندھیروں میں

لمس کے

گہری خامشی میں بدن کی

تکرار سی ہے کوئی

اس ایک تکرار کو سمجھنے

یہ خواب گاہوں میں

فرض آداب زوجیت کی ترازوئوں میں

جو تل رہا ہے

اس ایک سودے کو

ایک بازار کو سمجھنے

جو آج تک کچھ سمجھ نہ پائے

وہ حرف اقرار کی

تہوں میں اتر کے

تفصیل حاشیہ میں قرار کرتے

حقیقتوں کے ورق الٹتے

بدن کی اپنی شریعتوں کے

رموز و اسرار کو سمجھتے