غزل ۔۔۔ شکیب جلالی

غزل

( شکیب جلالی )

عشق پیشہ نہ رہے داد کے حقدار یہاں

پیش آتے ہیں رعونت سے جفا کار یہاں

سر ٹپک کر درِ زنداں پہ صبا نے یہ کہا

ہے دریچہ نہ کوئی روزن ِ دیوار یہاں

عہد و پیمان ِ وفا، پیار کے نازک بندھن

توڑ دیتی ہے زر و سیم کی جھنکار یہاں

ننگ و ناموس کے بکتے ہوئے انمول رتن

لب و رخسار کے سجتے ہوئے بازار یہاں

ہمسفر چھوٹ گئے، راہنما روٹھ گئے

یوں بھی آسان ہوئی منزل دشوار یہاں

کتنے طوفان اٹھے کتنے ستارے ٹوٹے

پھر بھی ڈوبا نہیں اب تک دل ِ بیدار یہاں