دوجی واری ۔۔۔ عارفہ شہزاد
دوجی واری
(عارفہ شہزاد)
چل فیر جیویں توں چاہنا ایں
کل حیاتی بھورا بھورا کر کے جیواں
میں نینوی آں ،
کیہ ہویا جے
ہور وی ہو جاواں میں نینواں
آپے دل زخمایا اے میں
آپے ایہدے پھٹ میں سینواں
چل فیر جیویں توں چاہنا ایں
ڈبدے دینہہ راتی کیوں تاراں
کملی آں میں اپنے آپ نوں آپ اساراں
قد بت اچا ہو جاوے تے
فیر کندھاں دے وچ دے ماراں
چل فیر جیویں توں چاہنا ایں
مڑ کے تینوں تکاں کیوں میں
اندر جھاتی پا کے ویکھاں
لگیاں دی اگ آپےسیکاں
دکھاں نال ای کنڈ میں ٹیکاں
چل فیر جیویں توں چاہنا ایں
اڈدی دھوڑ دے وانگوں
میں وی بہہ جانی آں
اپنے آپ دے نال ای
کھیڈ دی رہ جانی آں۔۔۔
میں ای آپے
تیرے مگروں لہہ جانی آں!
Facebook Comments Box