پینڈا اجے وی مکیا نہیں ۔۔۔ ریاض احمد شاد

غزل

( ریاض احمد شاد )

ورھیاں بدھی ٹردے رہے آں پینڈا اجے وی مکیا نہیں

فیر وی ساڈے حؤصلیاں دا کوئی پاندھی رکیا نہیں

خود غرضی توں کم لیا اے اگے جاندیاں راہیاں نے

پیر بچا کے آپ تے لنگھ گئے، راہ چوں پتھر چکیا نہیں

دھرتی آخر ہن دے اوندے ہڑھ نوں کویں سنبھالے گی

مٹی چوں تے پچھلے ہڑھ دا پانی حالی مکیا نہیں

دِن دی ووہٹی متھے سورج ٹِکہ لا کے بیٹھی رہی

اوہدا روپ ویاہون والا شاماں تیک وی ڈھکیا نہیں

دکھ دی کستوری تے کنے ای پردے پا پا تھکیا واں

شاد اک دل دا ہوکا لکھاں ہاسیاں وچ وی لکیا نہیں