حاضر پل ۔۔۔ شاہین کاظمی

نظم

شاھین کاظمی

اس حاضر پل نوں جینہڑا سکھ

کوئی رنگ جما کوئی گیت سنڑا
بنھ گنگھرو کدیں دھمالاں پا
پھڑ باہیں دل دیاں سَجنڑا وے
ایدھے نخرے سہہ ایدھے ناز اٹھا
ایس ٹھنڈی وا نوں پنکھ بنڑا کے
اَمبراں وچ فیر اُڈ دا جا
چَھڈ، دل دے سیک تے کی رونڑا
ہڈ لُوسدے ہن تے لُوسَنڑ دے
انہاں ہنجواں نوں توں دیپ بنڑا
اک وار سجن دلدار سجن
ایہہ روح دیاں پِیڑاں پاسے رکھ
ایہہ اتھرو گُھول دے رَت وِچ توں
اینہاں سرخ بُلاں تے ہاسے رکھ
آ ویکھ اشارہ زندگی دا
گلرنگ کنارہ زندگی دا
سُن عشق دی ونجلی کُوکَدی اے
اِیدی ہُوک مٹا
اِیہہ تِل تِل مردا جیون اے
اِیدھے درد ونڈا
جو بیت گیا سو بیت گیا
اِس حاضرپل نوں جینڑا سکھ
نہ کل دا بہہ کے سوگ منا

Share your Thoughts:

This site uses Akismet to reduce spam. Learn how your comment data is processed.

Show Buttons
Hide Buttons
%d bloggers like this: