کانواں ہتھیں ۔۔۔ صفیہ حیات

کاواں ہتھیں

صفیہ حیات

۔۔۔۔۔۔۔۔۔۔۔۔۔۔۔۔۔۔۔۔
اج بڑے چراں پچھوں
میں شکر دوپہرے ستی
۔
میں ویکھیا
بلیاں نے کتیاں نوں کھالیا
کوڑھ کرلی دا دودھ پی کے نیانے بڈھے ہو گئے
ٹڈیاں کڑیاں دا داج دہیج کھا گیئاں
تے
او گھروں نس کے کاواں ہتھیں آ گیئاں
۔
بوٹاں والے
سچ الیکن والیا نوں پھاہے لاکے
مڑ مکانی جاندے جاندے
فصلاں نوں اگ لا گئے
پنڈ دیاں کڑیاں نے
آگ تلی اتے دھر کے پی لئی
جیہڑیاں عورتاں ٹڈھوں سی
انہاں نے شرم گاہاں چیر کے متھے بنھ لیئاں
تے چھاتیاں اتے زہر لا کے
بھک نال جنگ کرن دی تیاری کیتی
جندرے ٹٹ گئے
کندھاں ڈھے پیئاں
۔
میں ابھڑواہے اٹھی
ویکھیا
امن دے جھنڈے سڑ گئے
انھا تے گونگا پنڈ ستا پیئا سی

Share your Thoughts:

This site uses Akismet to reduce spam. Learn how your comment data is processed.

Show Buttons
Hide Buttons
%d bloggers like this: