غزل ۔۔۔ احمد مشتاق

غزل

احمد مشتاق

یہ ہم غزل میں جو حرف و بیاں بناتے ہیں

ہوائے غم کے لیے کھڑکیاں بناتے ہیں​

انہیں بھی دیکھ کبھی اے نگارِ شامِ بہار​

جو ایک رنگ سے تصویرِ جاں بناتے ہیں​

نگاہِ ناز کچھ ان کی بھی ہے خبر تجھ کو؟​

جو دھوپ میں ہیں مگر بدلیاں بناتے ہیں​

ہمارا کیا ہے جو ہوتا ہے جی اداس بہت​

تو گل تراشتے ہیں، تتلیاں بناتے ہیں​

کسی طرح نہیں جاتی فسردگی دل کی​

تو زرد رنگ کا اِک آسماں بناتے ہیں​

دلِ ستم زدہ کیا ہے؟ لہو کی بوند تو ہے​

اس ایک بوند کو ہم بیکراں بناتے ہیں​

بلا کی دھوپ تھی دن بھر تو سائے بُنتے تھے​

اندھیری رات ہے، چنگاریاں بناتے ہیں​

ہنر کی بات جو پوچھو تو مختصر یہ ہے​

کشید کرتے ہیں آگ اور دھواں بناتے ہیں​

​