تین نظمیں ۔۔۔ وقار احمد
تین نظمیں
وقاراحمد گوجرانولہ پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بارش کی بوندوں میں تبدیل ہوتا بدن
سیاہ کالے بادل
ہمارے سر پر آچکے ہیں
چلو ایسا کرو
بادلوں میں چھپ جاو
اور
بارش بن کر مجھ پر برسو
جب بارش کی بوندیں
میرے بدن پر پڑیں گی
تو میرا
بدن بھی
بارش کی بوندوں میں تبدیل
ہو جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بس اب
میں نے مٹی کے برتن بنائے
اُس نے توڑ دیے
میں نے مٹی کی گڑیا بنائی
اُس نے توڑ دی
میں نے مٹی کا گھر بنایا
اُس نے توڑ دیا
پھر میں نے بیزار ہو کر
مٹی سے اپنا مجسمہ بنایا
اب وہ اُسے بھی
کمزور سمجھ کر توڑ
دینا چاہتا ہے
لیکن اب میں ایسا نہیں
ہونے دوں گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بارات آنے والی ہے
سجا دو جلدی سے
کمرے کو
بارات آنے والی ہے
”بھاٸی کس کی بارات آرہی ہے“
تمہیں نہیں پتہ پگلی:
”ہمارا باپ کراچی سے اک لڑکی کو
خرید کر لا رہا ہے“
سجا دو جلدی سے
کمرے کو
بارات آنے والی ہے