قلم دی کاہدی واہی ۔۔۔ افضل احسن رندھاوا
قلم دی کاہدی واہی
افضل احسن رندھاوا
راتاں جاگو
قلماں واہ واہ
چٹے کاغذ
کالے کر کر سُٹو
رَت سیاہی
ڈوبے لے لے
چھنک چھنک کے
قلماں واہو
کندھاں لئو شنگار
کالے کر کر سانبھی جاو
چٹے کاغذ
راتاں جاگو
قلماں واہو
قلماں واہوندیاں
عمراں دیو گذار
اوڑک مکنے کاغذ
سُک جانی رشنائی
تُٹ قلم نے جانا
تھک جانے نیں پوٹے
اندر والی
باہر اجے نہ آئی
فیر قلم دی
کاہدی واہی ؟
Facebook Comments Box